Giluba sa silingan angol

CEBU, Philippines - Naangol ang usa ka tawo   human kini dunggaba sa iyang silingan didto sa Marigondon, dakbayan sa Lapulapu sa miaging gabii. Ang biktima mao si Rodrigo Martibez, 31, ulitawo, nga nagpuyo sa sitio Cambiohan Ylaya, sa barangay Marigondon sa maong dakbayan.

Samtang ang suspetsado mao si Marcial Andales, 29, ulitawo, nga silingan sa biktima.

Si PO1 Michael Vincent Monares sa homicide section sa kapolisan sa maong dakbayan miingon nga didto ang biktima sa balay sa hinigugma niini nga nakig-inom sa pamilya sa iyang uyab.Samtang nagpadayon ang ilang inom kalit lang miabot ang suspetsado nga gikalalis sa kabanay sa hinigugma sa biktima. Dugang pa ni PO1 Monares nga misuway unta og uwang ang biktima sa maong panaglalis dihang kalit lamang kining gidunggab sa suspetsado.

Human sa maong pagpanunggab dali nga misibat ang suspetsado ug ang biktima dali usab nga gidala sa mga kabanay ngadto sa Lapulapu City Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo. Padayon pang gipangita sa kapolisan ang suspetsado.  (BANATNEWS)