Ex-convict giulo pagpusil patay

CEBU, Philippines - Patay diha-diha ang usa ka ex-convict human kini uloha pagpusil samtang nagkanta- kanta sa videokehan didto sa Sitio Pagbulangan, barangay Manduyong, lungsod sa Badian niadtong Domingo sa alas 7:00 sa gabii.

Ang biktima mao si Renato Mats, 32 , minyo, usa ka ex-convict ug molupyo sa maong dapit, samtang ang mga kriminal wala hiilhi nga nagsakay og motorsiklo.        

Si PO2 William Beltran sa Badian Police Station mibutyag sa Banat News nga ang biktima nalingaw sa pagkanta- kanta sulod sa videokehan   sa tindahan ni Nena Ligan kauban sa mga higala dihang kalit lang miabot ang usa ka motorsiklo nga gisakyan sa duha ka lalaki.

Unya ang angkas niini sa likod maoy nanaog ug milanses lang nga mopalit og load sa cellphone didto sa tindahan diin nagkanta-kanta ang biktima.

Apan dihang nakita niini ang biktima nga naggunit sa mikropono, giduol niini dayon gidul-itan sa iyang armas de fuego   ang ulo sa biktima ug sa pagbuto niini mideretso usab og sarasay ang biktima dayong kalup-og sa yuta ug nabugtoan sa kinabuhi.

Diha-diha nag-iyahay og panagan ang ubang mga customer sa videokehan samtang gisuta una sa kriminal nga wala nay kinabuhi ang biktima una kini mosakay og balik sa motorsiklo nga nagpaabot kaniya, dayon misirit kini paingon sa Tigbao.

Ang mga miresponding mga polis nakapunit og usa ka basiyo sa kalibre .45 nga pistola didto sa crime scene

Gituohan sa kapolisan nga hired killer ang responsabli sa maong krimen.

Ang biktima nakagawas sa bilanggoan niadtong 1998   sa kaso nga wala usab hisayri sa kapolisan.

Padayon pang gipangita  sa kapolisan ang kriminal. (/WC)  (BANATNEWS)