'Killer' sa 2 Police asset nadakpan

CEBU, Philippines - Nasikop sa kapulisan sa follow-up operations kagahapon sayo sa buntag diha sa Pahina Central sa dakbayan sa Sugbu ang gipasanginlang suspetsado sa pagpusil patay sa duha ka police asset niadtong Huwebes sa kaadlawon ug sa udto diha sa Carbon Market sa barangay Ermita ning dakbayan.

Si Arnel Ansay Gomez, alyas ‘Budlat’34, nagpuyo sa Balagtas St ., sa barangay Pahina Central, natapsingan sa tuong batiis human napusilan sa mga pulis dihang misuway kini sa pag-ikyas atol sa ginukdanay tali sa mga sakop sa Criminal Intelligence Branch (CIB) ug Investigation and Detective Management Branch (IDMB) sa Cebu City Police Office (CCPO).

Nakuha gikan kaniya ang usa ka .45 nga kalibre sa armas, pito ka bala sulod sa magazine niini ug laing pito sa extra nga magazine sa .45 pistol.

Diha sa balay niini nakakuha usab ang kapulisan og usa ka KG9 sub-machine pistol nga may magazine nga dunay sulod nga 20 ka bala ug laing 14 ka buhing bala sa laing mubo nga extra magazine, usa ka Nikon camera, drug paraphernalia sa shabu ug nubain ampule.

Apan si Gomez hugtanong mihimakak sa pasangil nga iya ang maong armas nga nakuha sa kapulisan ingon man ang kalambigitan sa duha ka pagpamusil sa duha ka police asset niadtong Huwebes nga sila si Catalino Entoma Jr., ug Michael Moralde Erasmo.

Matud ni Gomez nga usa ra siya ka dispatser og jeepney aron mabuhi niya ang lima niya ka mga anak ug ang ikaunom nga gimabdos karun sa iyang asawa.

Si Sr. Supt. Melvin Ramon Buenafe, hepe sa Cebu City Police Office (CCPO) nga nahinabi sa mga tigbalita nagkanayon nga si Gomez nahimong gun for hire dinhi sa dakbayan sa Sugbu.

Gituohang may nangasuko sa biktima diha sa downtown area ilabi na sa may Carbon Area. (BANATNEWS)