Suspek sa drive-by shooting sikop

CEBU, Philippines - Nasikop sa kapulisan sa dakbayan sa Sugbu ang usa sa tulo ka mga suspetsado sa duha ka drive-by shootings niadtong nakalabay nga semana diin dunay mga kinabuhi ang nakalas ug nangaangol sa maong hitabo.

Ang suspek giila sa kapulisan nga mao si Rhene Aligato Baclaan, alyas ‘Insik’, 22, taga sitio Suran sa barangay Quiot ug sakop sa Bloods Gang kinsa nakuhaan og usa ka .45 nga kalibre sa armas, walo ka buhing bala sulod sa magazine, bonnet, ball cap ug pito ka empty shells sa .45 ug laing duha ka extra nga buhing bala.

Si Baclaan maoy gitumbok nga hitman sa Bloods gang tungod sa pagdumot human siya gipusil sa mga sakop sa Crips gang niadtong nakalabay’ng tuig diha sa Kinasang-an.

Sumala pa sa report sa Criminal Intelligence Branch (CIB) ug Investigation and Detective Management Branch (IDMB) sa Cebu City Police Office (CCPO) nasuta nga si Baclaan nalambigit sa Pebrero 12 nga drive- by shooting diha sa Banawa diin duha ang nabiktima, gisundan kini niadtong Pebrero 15 sa kaadlawon diin tulo ang ilang gipamusil.Duna pay laing duha ka pagpamusil nga gisusi kung may kalambigitan si Baclaan nga nahitabo niadtong Nobiyembre 2011 ug Pebrero 11.Si Baclaan walay lipod-lipod nga miangkon atol sa interbyu sa mga tigbalita nga siya maoy mipusil sa duha ka mga sakop sa Crips Gang niadtong Pebrero 15 agi og panimawos.

“Mga kaila ra to nako sila, bawos ra tong ako kay sila maoy nipusil nako sa miaging tuig, nay bala oh,” sumala pang Baclaan, nga nihikap sa iyang tangkugo nga dunay bala nga miungot atol sa pakighinabi niini sa Banat News. Si Nita Baclaan, inahan sa suspetsado miingon nga inosente ang anak.

Si Sr. Supt. Melvin Ramon Buenafe, hepe sa CCPO nagkanayon nga nadakpan sa iyang mga sakop si Baclaan tungod sa positibong pag-ila sa mga saksi diha sa barangay Kinasang-an sa nahitabong pagpamusil niadtong Pebrero 15.

Si Chief Insp. Romeo Santander, hepe sa CIB nagkanayon nga ilaha nang gisubay ang tulo ka mga kauban ni Baclaan ug ang tag-iya sa awto nga gray sedan nga maoy ilang gisakyan. Daw nahupay ang kasingkasing ni Mayor Michael Rama pipila ka adlaw human siya mopadayag og kasagmuyo sa kapakyas sa kapolisan pagsulbad sa drive-by shootings.

Matud pa sa mayor plano niyang dugangan ang P2 mil monthly allowance sa kapolisan gikan sa city hall. (Uban sa report ni Sanden J. Anadia/EIM) (BANATNEWS)