Patay'ng babaye naglutaw sa dagat

CEBU, Philippines - Usa ka wala hiilhing babaye kinsa gituohang nalumos, nabangalan sa    mananagat nga naglutaw-lutaw sa dagat sa barangay Alegria, lungsod sa Cordova kagahapon sa buntag.

Ang maong babaye   nagsul-ob og itom nga t-shirt ug shortpants, nga gibanabana nga anaa sa 40-anyos pataas ang pangidaron.

Matud pa ni SPO1 Laurencio Wagwag sa Cordova Police Station nga sa alas 7:10 kagahapon sa buntag usa ka Ladi Tajanlangit maoy mitaho sa ilang buhatan kalabot niining maong patay’ng lawas nga nabangalan sa usa ka mananagat sa maong dapit.

Sa dihang miresponde si SPO4 Ceazar Labiano, ang OIC Chief sa Cordova Police Station uban ni SPO3 Henry Amores, ilang natino nga ang mananagat nga si  Arnold Quijano maoy miguyod   sa maong patay’ng lawas gikan sa fish sanctuary sa barangay Alegria ngadto sa baybayon sa Alegria.

Gibutyag ni Quijano ngadto sa mga otoridad nga iyang nakita nga naglutawlutaw sa dagat ang maong patay’ng lawas hinungdan nga iya kining gidala sa baybayon aron mailhan, apan wala’y   taga Cordova nga nakaila niini.

Nagduda si SPO4 Labiano nga nalumos ang maong babaye gumikan kay walay timailhan sa foul play ang iyang lawas.

Posible usab nga ipaubos sa autopsy ang maong patay’ng lawas aron masuta ang hinungdan sa kamatayon niini.

Apan may mga molupyo nga mitug-an sa kapolisan nga nakit-an nila kini sa sayo pa nga nagsuroysuroy sa kadalanan sa Cordova nga ingon og sa nalisoan sa maayong pangisip.

Ang haya niini anaa karon sa punerarya sa St. Francis sa dakbayan sa Lapulapu.  - BANAT NEWS