Miuwang sa away maoy giluba

CEBU, Philippines - Nalandig sa tambalanan ang usa ka 32-anyos nga lalaki human dunggaba sa hubog nga kalalis sa iyang bayaw didto   sa sitio Baybay, barangay Dumlog, dakbayan sa Talisay kagahapon sa buntag.

Ang biktima mao si Patronilo Moltalban, residente sa maong dapit, kinsa nasabak sa   tuong bahin sa iyang lawas.

Samtang ang suspetsado mao usab si Luisito Reyes alyas “Sito”, hingkod , silingan sa biktima.

Sa imbestigasyon nila ni SPO1 Mikie Espina ug PO2 Stephen Sefuesca nasayran nga ang bayaw nga lalaki ni Moltalban ug si Reyes kinsa pulos hubog maoy nagkalalis ug nagharong kay mag-away.

Busa miduol ang biktima ug giuwang ang duha apan siya naman hinuoy giatubang sa suspetsado ug gihansakan sa dala niining kutsilyo.

Human og pagpanunggab daling miikyas ang suspetsado samtang ang biktima gihatod usab dayon ngadto sa Talisay City District Hospital apan gibalhin    kini ngadto sa Vicente Sotto Memorial Medical Center sa dakbayan sa Sugbo. Padayon pang gipangita sa kapolisan ang suspetsado hangtod karon.  - BANAT NEWS