1 angol sa drive- by shooting

CEBU, Philippines - Duha   na usab ang gipusil diin usa ang naangol sa mga kriminal nga nagsakay og motorsiklo ug gray nga awto nga nagpasiugda sa drive-by shooting didto sa dalan Gochan sa barangay Mabolo ning dakbayan sa Sugbo kagahapon sa ala- 1:00 sa kaadlawon. Ang biktima mao sila si Angelo Sacin, 17, ug Anthony Ortega, hingkod , nga pulos   molupyo sa maong lugar.

Sa pasiunang imbestigasyon sa kapolisan nasasyran nga ang mga biktima naglingkod-lingkod lang sa maong lugar dihang kalit lang nadunggan nila ang mga buto-buto sa armas dili halayo kanila.

Dihang ila kining gisusi   gipauwanan sa mga bala gikan sa mga tawong nagsakay og motorsiklo busa   nanagan   ang mga biktima uban sa mga kauban niini dihang gisundan usab sila sa gray nga awto nga walay plate  number nga kauban sa nagmotorsiklo. 

Nasayran nila nga ang mipauwan kanila og mga bala mao ang nagsakay sa awto nga maoy nakaigo sa tiil ni Ortega.

Samtang si Sacin wala mataymingi sa bala kay puwerting kusoga nga midagan niini pagsalbar sa iyang kinabuhi.

Gihatod dayon si Ortega sa iyang mga kabanay ngadto sa Cebu City Medical Center samtang ang mga kriminal dali kaayong nakasibat. Napunitan sa kapolisan didto sa dapit nga nahitaboan ang walo ka kabhang sa kalibre .45, nga revolver, duha ka nalumping na nga mga bala niini , usa ka buhing bala sa .9mm ug duha usab ka kabhang sa .9mm.

Sa pakighinabi sa Banat News ni PO3 Ruth Violanggo sa Cebu City Police Office, Homicide Section mibutyag kini nga karon pa sila makasugat og susamang insidenti ug sutaon nila ang hinungdan ug ang motibo sa maong pagpamusil.

Matud pa ni Violanggo nga daghan ang mga posibling hinungdan sa pagpamusil gani , aduna na sila’y gisumpay-sumpay karon nga mga hitabo nga posibling maoy yawe sa pagsulbad sa drive-by shooting nga panghitabo ning dakbayan.

Dugang pa niya nga nakakuha na usab sila og impormasyon apan wala pa nila kini ibutyag sa media kay gisuta pa nila ang tanan.

Nasayran nga sa wala pa mahitabo ang maong pagpamusil ang mga kriminal nga nagmotor gikatahong tulison unta niini ang duha ka foreign national nga gituohang manag-uyab nga sila si Megomi Sano, 28 usa ka Japanese National ug sa hinigugma niini nga si Shuohung Weng, 28 usa usab ka Taiwanese.

Sa pakighinabi sa Banat News ni SPO2 Elmer Tanjay, sa Mabolo Police Station mibutyag kini nga ang mga biktima nagbaklay sa maong lugar dihang kalit lang nga gihunongan sa nagmotorsiklo ug mideklarar kini nga tulis.

Apan wala madayon ang maong tulis sa diha nga misuway pagsukol ang lalaki nga si Weng nga nakapadani sa atensyon sa mga estambay sa maong lugar .

Tungod niini ang mga tulisan nga nagmotor mipasalba sa ilang armas ug mipadagan paingon na ngadto sa dalan   Gochan diin didto namusil sa mga batan-on nga nag-estambay niadtong higayona.  - BANAT NEWS