Lawak saringan sa Tanke Elem. School peligro

CEBU, Philippines - Usa ka lawak saringan diha sa Tanke Elementary School sa dakbayan sa Talisay niining bag-o lang girekomendar sa city engineering nga dili ipagamit tungod kay kuyaw nang mahugno.

Kahinumduman nga niadtong milabay’ng mga adlaw ang tulo ka andanang edipisyo nga gilangkuban sa siyam ka mga classroom diha sa San Roque Elementary School ang girekomendar sa city engineering nga dili una ipagamit paglikay sa disgrasya tungod kay duna kini dagkung mga liki human sa nahitabong linog.

Si Talisay City Engineer Audie Bacasmas nga nahinabi sa mga tigbalita kagahapon mibutyag nga padayon gihapon karon ang ilang pagpahigayon og inspeksyon sa mga pampublikong tunghaan ug pribadong tunghaan.

Matud ni Bacasmas nga niining ulahi ang usa ka classroom sa Tanke Elementary School ilang namatikdang naliwag na ang haligi ug wala na sa tukmang posisyon ug ang bungbong mitakilid na ug nahulpa ang sawog.

Si Flordeliza Villa, school head sa Tanke Elementary School mibutyag wala na ipagamit sa grade three ug grade two ang maong lawak nga natukod napulo na ka tuig ang milabay.

Gawas niini dunay laing classroom sa maong tunghaan nga nahimutang sa ibabaw’ng bahin o sa ikaduhang andana sa laing building ang duna nay mga liki. (BANATNEWS)