Open heart surgery mahimo na sa VSMMC

CEBU, Philippines - Ang Vicente Sotto Memorial Medical Center (VSMMC) mopalapad sa ilang serbisyo sa panglawas diin karong Pebrero 21, 2012 sa alas 7:00 sa buntag ilusad ang VSMMC-SIH Heart Center diin sa unang higayon ipahigayon ang Open Heart Surgery ngadto sa 13-anyos nga batang lalaking pediatric patient nga dunay Atrial Septal Defect (ASD).

Ang team sa mga surgeon gipangulohan kini ni Dr. Monico Perez, tumong niining bag-ong serbisyo sa VSMMC nga mahimong globally competitive tertiary health center ang maong tambalanan.

Ang VSMMC mapasigarbohon nga nahimong usa sa mga napiling medical center nga moimplementar sa maong mandato sa Department of Health (DOH) nga gitawag og Development of Subspecialty Capabilities for Heart-Lung-Kidney.

Ang maong bag-ong serbisyo gihatag sa piniling mga regional hospitals sa Visayas, Luzon, ug Mindanao nga pormal nga gitugyan niadtong Disyembre 9, 2011.

Ang atrial septal defect usa ka congenital heart defect diin ang wall nga nagbuwag sa upper heart chamber (atria) wala makompleto og kasirado.

Ang maong depekto sa kasingkasing kasagaran daan o dinala na sa pagkatawo palang sa usa ka bata.

Ang mga sintomas niini magsugod bisan kanus-a gikan sa pagkatawo sa usa ka bata hangtud nga magtubo na kini.

Ang ASD wala magkinahangaln og treatment kung walay mabatyagan nga mga sintomas o kung gamay lang ang depekto.

Ang surgical closure o pagsirado sa naabling bahin sa kasingkasing nga depektoso girekomendar lang nga operahan kung dako o kung ang kasing-kasing modaku o dunay mga gipamating sintoma ang mga dunay ASD.

Ang mga pasyenteng nagkinahanglan og heart surgery pwede na unyang anha magpatambal sa VSMMC nga dili na magkinahanglang makagasto og daku apan world class ang kalidad sa serbisyo ug pag-atiman ang ilang matagamtaman.

Sagad sa mga tambalanang pribado lamang nga adunay mga espesyalista alang sa open heart surgeries ang nag-offer niini nga serbisyo apan bugti sa mahal nga bayad nga dili maabot sa mga kabus. (/EIM) (BANATNEWS)