Kapitolyo migasto'g P20M alang sa biktima sa kalamidad

CEBU, Philippines - Mikapin sa P20 milyones ang gigahin nga hinabang ni Governor Gwendolyn Garcia sa milabay’ng tuig alang sa pagtubag sa Disaster Management/ Response sa mga katalagman nga miigo sa tibook lalawigan sa Sugbo.

Samtang, mikapin usab sa P11 milyones ang nagasto usab sa gobernador sa mga hinabang ngadto sa mga tawo nga nahiagom sa katalagman, sumala ni    Marivic Garces, hepe sa Provincial Social Welfare Office (PSWDO).

Sa iyang pamahayag sa Sugbo News Team si Garces mibutyag nga kining tanan maoy unod  sa iyang giduso nga accomplishment report sa buhatan sa gobernador.

 Matud pa ni Garces nga ang Disaster Management/Response maoy usa sa gitutokan pag-ayo sa gobernador ug gibuboan sa daghang hinabang   nga gisentro   sa mga nabiktima sa sunog; bagyo; baha; pagdahili sa yuta; nalumos; biktima sa pag pangabuso; murder; vehicular accident ug linog

Gitug-an usab ni Garces nga mikabat sa 11 mil kapin ka mga tawo nga na-hospital sa lalawigan sa Sugbo ang gihatagan og hinabang sa gobernador pinaagi sa Assistance to Individual in Crises Situation program nga gilangkoban ning mosunod: Walk-in-clients; admitted at Vicente Sotto Memorial Medical Center; admitted at the Provincial/District Hospitals; Referrals ug uban pa.

Gipahinumdoman usab ni Garces ang mga kadagkoan sa matag local government unit sa pagmabinantayon kanunay sa panahon sa katalagman. (BANATNEWS)