P50 mil sa makahatag og impormasyon
CEBU, Philippines - Mibutang og ganti nga P50 mil ang pamilyang Sesbreño sa tawong makatabang sa imbestigasyon sa kapolisan sa pagpresentar ug pagpasaka og kaso batok sa triggerman, lookout ug mastermind sa insidente sa pagpamanhig sa ilang kabanay.
Kahinumduman nga si Virgie Sesbreño ug laing duha ang namatay sa maong insidente ug hangtud karon wala pa madakpi ang duha ka mga kriminal kinsa nagsakay og usa ka motorsiklo.
Ang gitumbok nga hinungdan sa maong insidente ang kabahin sa bangi sa yuta.
Niadtong milabay'ng adlaw, si Atty. Raul Sesbreño mibutyag nga ang iyang anak nga si Peter Sesbreño maoy nagplanong mohatag og reward aron daghan ang motabang nga masikop ang mga mamumuno.
Sa laing bahin, si Supt. Eddie Recamara ang hepe sa Talisay City Police Station mibutyag nga gikatakda na nilang pasakaan og kasong multiple murder ang mga suspetsado.
Matud sa hepe nga wala pa gyud nila masikop ang mga suspetsado apan nailhan na nila kini ug gani duna silay cartographic sketch na sa duha.
Apan ang hepe nagdumili sa pagbutyag sa pangalan sa mga suspetsado samtang wala pa nila mapasaka ang kaso.
Si Recamara midugang nga mopahigayon pa sila og lawom nga imbestigasyon batok sa utok sa nahisgutang krimen. (/EIM) (BANATNEWS)
- Latest
- Trending
