Trak mitakilid trapiko nabara

CEBU, Philippines - Milanat og kapin upat ka oras ang pagkabara sa trapiko kagahapon sa buntag sa Cebu South Coastal Road habig sa barangay San Isidro, dakbayan sa Talisay gumikan sa 10-wheeler truck nga nabuthan og ligid nga nausamod ug nagtakilid nga nagbabag sa karsada.

Hinuon walay gikatahong naangol sa maong hitabo.

Si SPO4 Ernesto Navales sa traffic division mibutyag   sa Banat News nga nagsugod ang pagbara sa mga sakyanan nga gikan sa habig sa dakbayan sa Sugbo sa pasado alas 10:00 sa buntag ug hangtud pasado alas 3:00 sa hapon kagahapon sa pagsuwat ning balita wala pa maugkat ang   nahisgutang trak.

Matud ni Navales nga ang maong trak gikan sa dakbayan sa Sugbo nga kargado og sinakong yellow corn nga himuong feeds ug nagpaingon   kini sa lungsod sa Minglanilla dihang kalit lang mibuto ang duha ka ligid niini sa atubangan hinungdan nga naumod kini sa karsada dayon mitakilid.

Matud usab ni Navales nga dali siyang mipadala og mga traffic enforcer ngadto sa maong lugar nga maoy nag-atiman sa dagan sa trapiko inabagan sa mga tanod sa barangay San Isidro.

Si Navales midugang nga ang nakalangay pag-ugkat sa sakyanan mao ang kadugay nahuman sa paghinakutay sa kargamento niini ngadto sa laing trak .

Nasayran nga ang kabug-at sa karga uban sa karaan na kaayong mga ligid sa maong trak maoy usa sa gitumbok nga hinungdan sa pagpamuto niini. (BANATNEWS)