Ilawom sa flyover koralon way magpatil-is

CEBU, Philippines - Gilig-on sa konseho sa dakbayan sa Talisay nga koralon na og puthaw ang ilawom sa flyover sa barangay Tabunok aron dili na himoong ihianan ang maong lugar.

Gawas sa kapan-os sa ihi gumikan kay anha ra magpatil-is ang mga drayber sa traysikol, mahawanan usab ang maong lugar sa iparking nga mga traysikol ug mga mamaligyaay kon mga vendor. Nasagop ang maong kaugmaran human magkalalis si Vice Mayor Alan Bucao ug Konsehal Romeo Villarante bahin sa gisugyot sa nahauna nga police station ang itarok sa ilawom sa flyover aron mahawan ang maong lugar gikan sa mga traysikol.

Ang tuyo ni Bucao nga aron mahadlok na sa polis ang mga drayber sa traysikol ug gawas nga dili na kini mamarking sa ilang sakyanan, dili na usab mangihi ang mga drayber sa maong dapit nga maoy nakapagabok sa semento sa ilawom sa flyover ug nakapa-angso sa maong dapit.

Nagkasinukliay og hait nga mga pulong si Bucao ug si Villarante tungod kay gipasabot sa konsehal nga ang pagtukod og police station ilawom sa flyover nakalapas sa national building code tungod kay ang lugar nga tukoran niini anaa sa national highway.

Matud pa ni Villarante nga makahatag kini og kasamok sa maong lugar kay dili kalikayang may mga transaksyon ang publiko dihang dapita uban sa mga sakyanan niini nga labing makahuot sa maong dapit.

Gituki usab ni Villarante ang bahin sa gitukod nga buhatan sa City of Talisay-Traffic Operation Development Authority (CT-TODA) nga natukod sa ilawom sa flyover habig sa dakbayan sa Sugbo kay matud pa niya nakalapas kini sa national building code.

Hinuon bisan sa pagpangugat ni Villarante, ang nahisgutang resolusyon ni Bucao naaprobahan ra gihapon apan giusab ang texto ug tuno niini nga imbes police station ang tukoron, rail link o koral nga puthaw ang ikoral ilawom sa flyover aron walay mga traysikol ug mga vendor ang magpundo sa maong dapit ug wala nay magpataka og patil-is sa ilang ihi.

Sa laing bahin, si Bucao mikwestiyon sa oposisyon nganong karon pa moreklamo sa gitukod nga buhatan sa CT-TODA sa maong lugar.

Matud ni Bucao nga ang siyudad dunay clearance gikan sa Department of Public Works and Highways (DPWH) sa pagtukod sa maong edipisyo ug ang city engineering adunay gisagop nga panukdanan sa pagtukod niini.

Busa giawhag ni Bucao ang mga miyembro sa oposisyon nga motabang sa pag-implementar sa balaod aron mahawan ang ilawom sa flyover ug ikalipay niya ug iya kining hangopon ug aron dili na sila magpunay og panabi nga wala sila imbitaha sa administrasyon sa mga maayong plano niini alang sa   dakbayan.(/WC)  (BANATNEWS)