1 patay 1 angol gipamusil sa nagmotor

CEBU, Philippines - Usa ang patay ug usa usab ang angol sa pagpamusil nga gihimo sa mga kriminal nga de motor   sa managlahing oras ug lugar ning dakbayan kagahapon.

Ang mga biktima mao sila si Noel Gadiano, 33 usa ka drayber sa traysikad, nga taga barangay Inayawan, ug Rey Ann Cabrinez, 26, hingkod, nga taga dalan Jones Avenue, barangay Sambag 1pulos ning dakbayan sa Sugbo.

Sumala sa kapolisan nga si Gadiano nagpaabot sa iyang traysikad alas 5:00 pasado sa hapon, dihang   kalit lang mihunong sa iyang atubangan ang usa ka motorsiklo nga gisakyan sa duha ka wala hiilhing lalaki

Unya ang  nag-angkas sa luyo niini milanit sa armas de fuego ug gipusil sa makadaghan ang   biktima nga maoy hinungdan sa hinanaling kamatayon niini. Nagduda si SPO4 Alex Dacua sa Cebu City Police Office, Homicide Section nga posibling adunay pagdumot ang kriminal sa biktima.

Samtang nianang pagka-alas 7:00 pasado sa gabii , si Cabrinez mao na usab ang gipusil sa kriminal nga nagsakay gihapon og motorsiklo didto sa sitio Caimito, sa dalan Urgello, barangay Sambag 1.

Nasayran nga ang biktima nagpalit og softdrink sa usa ka tindahan sa ilang dapit, dihang kalit lang mihunong sa iyang duol ang usa ka motorsiklo nga gisakyan gihapon og duha ka tawo ug ang angkas gihapon niini sa luyo maoy miluthang kaniya.

Human siya matumba gumikan sa mga samad sa nagkadaiyang bahin sa iyang lawas, gibiyaan ra siya sa mga kriminal nga mipasirit sa ilang sakyanan pahilayo sa maong dapit. Gihatod dayon siya sa iyang kabanay ngadto sa Sacred Heart Hospital.

Gisubay karon sa kapolisan kun ang nagpusil kang Cabrinez ug Gadiano mao ra bang mga kriminala.

Gitun-an sa kapolisan kun kabahin ba kini sa drive-by shooting nga panghitabo ning dakbayan. (BANATNEWS)