Giselosan girapido angol

CEBU, Philippines - Angol ang usa ka dalaga human rapidoha sa gituohang nagselos kaniya ang ilang balay sa mga kriminal nga wala hiilhi didto sa bukirang bahin sa sitio Calapayan, barangay Tubod sa lungsod sa San Fernando sa miaging Biyernes sa kaadlawon.

Ang biktima mao si Rosally Impil, 18, dalaga nga nagpuyo sa maong lugar.

Si PO1 Janel Figura sa San Fernando Police Station mibutyag sa Banat News nga ang biktima kauban sa iyang kapuyo nga si Floriano Ombay, 26, nahinanok kaayo sa pagkatulog ug mao nalay namat-an nila ang nagpaka-paka nga buto sa armas de fuego kansang bala nanuasik sulod sa ilang balay ug usa sa maong mga bala mitaroy sa tuong paa sa biktima.

Dihang mihunong na ang buto-buto sa armas dali nilang gipasiga ang suga ug nakita nila ang dugo nga mibanaw na sa sawog gikan sa samad sa biktima.

Migawas si Ombay ug nakita niya ang bongbong sa ilang balay nga natusak sa mga bala sa armas de fuego sa mga kriminal kinsa dali kaayong nakapahilayo gikan sa maong lugar 

Gihatud dayon niini ang biktima ngadto sa Vicente Sotto Memorial Medical Center (VSMMC) sa dakbayan sa Sugbo.

Ang mga polis nga mirespondi sa alarma nakapunit og lima ka mga slug sa kalibre 45 nga pistola sa palibot sa balay sa biktima.

Subay sa gihimong pakisusi sa kapolisan gikan sa mga silingan sa mga biktima nasayran   nga unom pa ka buwan nga nagpuyo sa maong lugar ang maghigugmaay ug ang babaye nga naigo maoy lumad nga molupyo sa maong lugar.

Blangko pa ang kapolisan pagtumbok sa motibo sa maong pagpangrakrak ug sumala sa mga silingan nga murag walay kaaway ang mga biktima sa ilang dapit.

Gikatahapan usab nga posibling may kaibog sa biktimang babaye ang namusil busa selos ang gitan-aw’ng anggulo sa kapolisan niining maong hitabo.(/WC) (BANATNEWS)