Way apil sa demolison ang may kontratang vendors

CEBU, Philippines - Giamendar ni Mayor Socrates Fernandez ang giluwatang Executive Order sa pagpasirado sa mga stalls diha sa Nacario Trade Center (NTC) subay sa kamanduan sa korte nga ipahunong ang pagpasirado sa mga stalls diha sa nahisgutang pribadong merkado nga nahimutang sa Tabunok.

Niadtong Pebrero 15, 2012 si Regional Trial Court (RTC) Judge Estella Alma Singco sa Branch 15 miluwat og kamanduan ngadto kang Fernandez pagpahunong sa pagpasirado sa mga stalls diha sa NTC nga adunay kontrata sa tag-iya sa edipisyo nga mao ang pamilyang Nacario.

Apan kinahanglang sundon ang kasabutan tali sa mga Nacario ug sa siyudad nga ang mga vendor nga dunay kontrata diha sa NTC dili mahimong makabaligya og mga bugas, utanon, prutas, karne, isda, canned goods, noodles, buwad, itlog ug ubang mga poultry products.

Ang maong kamanduan sa korte gituman sa siyudad ug giamendar sa mayor ang EO Numero 2012-005 nga unang gipagawas ni Fernandez niadtong Pebrero 14, 2012 sa rason nga walay mga business permits ang kapin 130 ka mga stalls sa maong edipisyo.

Gihulagway sa mga apektadong vendors nga pagpang-harass sa ilang panginabuhian ang gihimo sa siyudad. Dugang pasangil na nila nga maong wala silay mga business permits kini tungod kay dili gustong moisyu niini ang siyudad.

Buot sa dakbayan nga adto sa bag-ong gitukod nga merkado publiko sa Lagtang pabalhinon ang maong mga vendors. (BANATNEWS)