Mga drayber, pasahero mitiyabaw sa re-routing

CEBU, Philippines - Mipadayag sa ilang reklamo ang mga drayber sa pasaheroan nga mga sakyanan ug bisan na ang mga pasahero sa lungsod sa Cordova nga naapektohan sa gipatuman nga re-routing sa buhatan sa City Traffic Management System (CTMS) sa dakbayan sa Lapulapu tungod sa kahasol.

Ang mga jeepney nga naapektohan mao ang rotang MI-03B nga nagbiyahe sa lungsod sa Cordova ug Mactan Export Processing Zone sa barangay Ibo sa dakbayan sa Lapulapu.

Hinuon kini usa lamang ka experimental rerouting nga gisugdan niadtong petsa 14 ning bulana aron tun-an kung asa dapitang mga karsada sa siyudad ang maghuot gyud sa mga sakyanan.

Si Frank Brazil, pangulo sa CTMS miingon nga ang mga pasaheroang padulong sa barangay Looc, adto na moliko sa tuo paingon sa dalan A. Tumulak ug adto molabay sa atubangan sa Lapulau City Hospital ug moliko sa tuo sa dalan S. Osmeña ug molahos sa access road nga paingon sa Hoopsdome sa barangay Gun-ob.

Gikan didto molahos kini sa dalan Old Maribago ug moliko sa tuo paingon sa Mayor Maximo Patalinghug Avenue ug molahos paingon sa Mactan Mandaue Bridge ug mopaingon na ngadto sa M.L. Quezon Avenue sa MEPZ sa               barangay Pusok sa maong dakbayan.

Hangtod sa Marso 16 pa tapuson ang experimental re-routing ug human niini ang iyang buhatan mosumitir na sa resulta sa ilang obserbasyon.(/EIM) (BANATNEWS)