Ligoy nga kawani gipa-ombudsman

CEBU, Philippines - Usa ka non-uniform personnel (NUP) sa Talisay City Police Station (TCPS) gisumbong ngadto sa Ombudsman tungod sa pagkaligoy niini sa iyang trabaho.

Gawas sa pagkaligoy, sila si Arturo Reyes Sr, ug Petronilo Abasanta Jr.,pulos hingkod nga managsilingan sa sitio Sawsawan, barangay San Roque, dakbayan sa Talisay, pulos job order nga kawani sa city hall kinsa nadestino sa TCPS, mipasangil nga si Charito Labajo, hingkod, nga taga barangay Cansojong sa mao gihapong siyudad   nga arogante pa kaayo og kinaiya.

Sumala kang Reyes nga gawas nga arogante , si Labajo kusog usab kaayong   mangasaba sa mga kliyente   nga manguha og police clearance sa police station.

Unya matud pa ni Reyes nga si Labajo puwerting ligoya kay motungha kini sa opisina, alas 8:45 na sa buntag ug molingkod lang makadiyot dayon mobiya sa trabaho.

Laing pasangil ni Reyes nga si Labajo giingong daghang raket sa police station ug giingong nakuhaan kini og hulagway sa usa ka polis nga midawat og kwarta gikan sa usa ka kliyente.

Samtang si Abasanta misigunda usab kang Reyes sa pagpasangil kang Labajo nga arogante ug dili siya makalimot nga gikasab-an siya niini nga walay hinungdan dihang milukat siya og police clearance.

Si Labajo sa iyang bahin mihimakak ning maong mga pasangil ngadto sa taga media ug nagkanayon nga iyang atubangon ug tubagon ang maong mga reklamo.

Hinuon miangkon kini nga may usa ka higayon nga ang iyang paryente nga naglukat og police clearance mitunol kaniya og P40 para pang snacks ug gipalit usab niya kini og snacks uban sa usa niya ka kauban sa opisina.

Sa laing bahin usab, si Police Superintendent Eddie Recamara, hepe sa TCPS nagkanayon nga mopahigayon siya og imbestigasyon sa maong insidente ug ipatawag niya sila si Labajo ug Reyes.

Si Recamara midugang nga bahin kang Labajo maghuwat na lang siya kung unsay hukom sa Ombudsman sa kaso niini. (BANATNEWS)