65-anyos gilugos, suspek nagpasalamat pa

CEBU, Philippines - Usa ka 65-anyos nga lola ang mireklamong gilugos sa usa ka lalaking hubog ug gidudahang sabog sa paggamit sa ginadiling drugas sa miaging kaadlawon diha sa bakanteng luna sa usa sa mga barangay sa habagatang bahin sa siyudad sa Sugbu.

Ang biktima nga residente sa maong lugar miila sa suspek nga nadakpan sa kapolisan sa Punta Princesa Police Station nga si Danilo Cominguez, 24, nga taga sitio Lawom Tabay sa barangay Tisa.

Ang biktima nga naghilak nga misaysay sa Banat News nga nianang alas-3 sa kaadlawon niadtong Huwebes paingon siya mangompra sa Carbon dihang kalit siyang gibitad sa suspek nga nagtabon og malong sa nawong dayong pasok sa duha niini ka kamot ngadto sa iyang baba.

Miaksyon unta siya og lugnot apan gihulga siya sa suspek nga adunay dautang mahitabo kaniya kung molighot ug giingong mihangyo niya ang suspek nga makighilawas kaniya ug sa iyang kahadlok nga patyon iya nalang kining gipaundayonan.

Matud pa niini human makapahuwas ang suspek giingong mipasalamat pa kini kaniya duha ka higayon.

“’La salamat ha?, Salamat ‘la ha?” matud pa sa suspek nga gisaysay sa biktima apan dihang higayuna siya nakahigayon pagpukas sa gitabon sa suspek sa nawong niini.

Ang anak nga lalaki sa biktima maoy nangita sa suspek ug naabtan kining naghigda pa sa dakong hawan ibabaw nga bahin sa ilang pinuy-anan nga nagtabon sa malong.

“Wala gyud ko kahibalo na sir, pagkabuntag gipukaw nalang ko sa akong asawa ug gipahibawo nga ako kuno ang naghilabot. Gikan ko ato naninda og mani wala nako kauli sa amoa kay hubog kaayo ko,” panghimakak pa sa suspek.

Si Chief Insp. Aileen Recla, hepe sa Punta Princesa Police Station mitug-an sa Banat News nga lig-on ang kasong ilang ikapasaka batok sa suspek tungod kay positibo nga giila sa biktima ang suspek.  (BANATNEWS)