2 police asset gipatay

CEBU, Philippines - Duha ka mga kanhi police informants sa Cebu City Police Office ang gipamusil sa managlahing takna diha sa barangay Ermita ug barangay Pasil ning dakbayan kagahapon.

Unang gitumba mao ang 36-anyos nga si Michael Moralde, 36, molupyo sa sitio Abuno sa barangay Pasil ug giingong asset kaniadto sa Criminal Intelligence Branch (CIB) sa Cebu City Police Office (CCPO) alas-3 sa kaadlawon.

Base sa imbestigasyon ni SPO1 Ruth Violango ug mga kaubanan sa Homicide Section gikan sa sudlonong bahin sa maong lugar ang biktima dihang kalit kining gisugat sa wala mailhing mamumuno ug gipusil sa walay igong hinungdan.

Human niini milakaw ang mamumuno sa gibiling motorsiklo ug mipasirit palayo. Ang biktima nakaangkon og samad pinusilan sa duha ka paa daling gidala sa Cebu City Medical Center (CCMC) apan pagka alas 4:30 nakabsan kini sa iyang kinabuhi.

Si Violango miingon nga nagsul-ob og helmet ang kriminal. Nagduda silang may kalambigitan sa pagka-asset sa kapolisan sa biktima ang motibo sa krimen.

 Ang ikaduhang police informant nga gipatay sakop sa gibungkag nga Barangay Intelligence Network (BIN) kagahapon sa udto diha sa Carbon Public Market samtang ang biktima ug ang hinigugma niini namalit sa maong lugar.

Duha ka wala mailhing tawo ang daling mibiya sa maong lugar sakay sa motorsiklo paingon sa sudlonong bahin sa Carbon human ang angkas niini mipusil patay sa biktimang si Catalino Entoma Jr. 39, nga taga barangay Ermita.

Si Entoma nakaangkon og samad pinusilan sa ulo nga maoy nakaingon sa iyang hinanaling kamatayon.

Sa pasiunang pakisusi nga gihimo sa Homicide Section sa Cebu City Police Office (CCPO) nagbutyag nga si Entoma ug hinigugmang si Mylen Cuna namalit sa maong merkado ug pag-abot sa tunga-tunga sa Unit 1 ug 2, kalit lang miabot ang duha ka tawong nagsakay og motorsiklo.

Ang angkas mipusil dayon sa biktima makadaghang higayon. Si Entoma kanhi nahimong watchman diha sa downtown area sa usa ka mall ug giingong aduna nay nadakpang mga kawatan sa maong lugar.

Si Sr. Insp. Jul Mohammad Jamiri, hepe sa Homicide Section nagkanayon nga ila karung susihon ang posibilidad nga panimawos ang anggulo sa pagpusil patay sa biktima. (/EIM)  (BANATNEWS)