2 angol sa drive-by shooting

CEBU, Philippines - Naalarma na ang kapolisan dinhi sa dakbayan sa Sugbo niining nagsunod-sunod nga kaso sa drive-by-shooting diin duha na usab ka batan-ong sakop sa Crips gang ang gipamusil sa nagsakay og awto didto sa highway sa barangay Kinasang-an, ning dakbayan sa Sugbo kagahapon sa kaadlawon.

Ang mga biktima mao sila si Julius Atillo, 17, taga sitio Tabok-Canal, barangay Pardo ug Stephen John Anga, 16, taga F. Jaca Street, sa barangay Inayawan, pulos ning dakbayan sa Sugbo. Kini maoy ikatulo na nga drive-by shooting sulod ning buwana diin ang una nahitabo niadtong Pebrero 4, ikaduha niadtong Sabado sa kaadlawon diin usa sa tulo ka biktimang pulos batan-on nakabsan gyud sa kinabuhi sulod sa tambalanan.

Sila si SPO4 Alex Dacua ug PO1 Esmer Escultor sa Homicide Section sa Cebu City Police Office (CCPO) mibutyag sa mga tigbalita nga sa alas 2:30 kagahapon sa kaadlawon   ang duha ka bayong-bayong nag-atang og kasakyang PUJ sa maong lugar aron mamauli sa ilang tagsa-tagsa ka balay.

Dihang kalit lang miabot ang kolor gray nga awto nga walay plate number ug samtang nag-aginod ang dagan niini , usa sa mga sakay nga naglingkod sa luyo   miabli sa bintana dayong pamusil ngadto kanila sa walay igong hinungdan.

Si Atillo nakaangkon og samad pinusilan sa tuong bahin sa iyang ulo, samtang tuong tuhod, tuong dapi-dapi ug bukobuko ang naangkong mga samad pinusilan ni Anga.

Human malukapa sa yuta ang mga biktima mipasirit dayon sa ilang sakyanan  ang mga kriminal

Ang duha ka mga biktima daling gihatud ngadto sa Cebu City Medical Center (CCMC) sa mga sakop sa Mobile Patrol Group Car 020 . Ang kapolisann nakapunit og 9 ka kabhang sa gituohang .45 kalibre nga pistola sa dapit nga nahitaboan.

Si Sr. Supt. Melvin Ramon Buenafe, hepe sa CCPO nga nahinabi sa mga tigbalita miangkon nga naalarma na sila niining sunod-sunod nga drive-by shooting dinhi sa dakbayan sa Sugbo.

Apan iyang gipasalig nga wala nila kini katulgi   ug padayon ang ilang paningkamot nga madakpan ug mailhan ang mga responsabli.

Hinuon nagtuo si Buenafe nga binuhatan kini sa mga sakop sa gang sanglit ang kasagarang biktima sa drive-by shooting pulos miyembro og gang.

Dili pa hinuon makasulti si Buenafe kun mao ra ba usab kini  ang mga kriminal sa mga nahaunang   drive-by shooting niadtong Sabado sa kaadlawon didto sa V.Rama Avenue ug gisundan sa Guadalupe dayon sa barangay Carreta diin usa sa tulo ka biktima nakabsan sa kinabuhi.

Hinuon giklaro ni Buenafe nga ang maong kaso usa ka isolated ug walay kalambigitan sa kasaulogan sa Valentine’s Day.

Matud ni Buenafe nga sa ilang pagpatrolya ug pagpahigayon og checkpoint sa nagkalainlaing lugar dinhi sa dakbayan nasabtan nila nga sila ra usab ang gibantayan sa mga kriminal

Subling giawhag ni Buenafe ang mga ginikanan sa pagbantay pag-ayo sa kalihokan sa ilang mga anak ilabi na sa panahon sa kagabhion.

Hinuon gitataw ni Buenafe nga kining sunod-sunod nga drive-by shooting dinhi sa dakbayan dako kaayo og kalabtanan ang panagdumot sa mga magkaribal nga mga gang sa fraternity nga maoy ilang gibantayan karon.  - BANAT NEWS