P200 mil gisakiyo sa kawatan

CEBU, Philippines - Kapin sa 200 mil pesos nga halin sa usa ka distributor og softdrinks sa isla sa Bantayan ang nasakiyo sa mga kawatan nga nahimutang sa barangay Mansilang lungsod sa Madredijos niadtong Martes sa alas 4:30 sa kaadlawon. Ang nabiktima sa pagpanglungkab mao ang AC Farm kon Alex Chiong Farm nga nahimutang sa maong lugar ug giingong nawad-an og P202,784 nga remittance sa ilang mga sales agents.

Matod ni PO2 Jeffrey Barco sa Madredijos Police Station nga nahinabi sa Banat News ang caretaker nga si Ernie Loyao maoy nakadiskubre nianang sayo sa buntag nga gilungkab ang ilang buhatan ug sa iyang pagsusi sa sud nahanaw na ang ilang koleksyon nga gibutang diha sa lamesa.

Base sa imbestigasyon nila ni Sr. Insp. Jaime Santillan, hepe sa kapulisan sa maong lungsod ang mga wala pa mailhing kawatan miguba sa kisame sa gawas nga bahin sa maong establisamento aron makasulod. Human makuha ang kwarta diha na moagi sa pultahan.  - BANAT NEWS