Asawa ug kabit naabtan nag-akob

CEBU, Philippines - Usa ka asawa ug kabit nga naabtan sa bana nga naghilawas sa ilang katre nasikop sa kapolisan ug gibalhug deretso sa prisohan sa kagabhion niadtong valentine’s day didto sa sitio anakma sa barangay pagsabungan, dakbayan sa mandaue.

Ang babaye kansang ngalan giila lang sa ngalang Joy (di tinuod nga ngalan) usa ka asawa sa taxi driver, samtang ang lalaki nga giila lang sa ngalang Boy (di tinuod niining ngalan) ila usab nga silingan.

Si Insp. Wilson Abot, hepe sa Presinto 3 sa Mandaue City Police Office (MCPO) nga nagbase sa barangay Basak sa maong dakbayan maoy nangulo sa pagdakop kang Joy ug Boy.

Ang pagsikop sa duha nahimo human ang bana sa babaye nga si Roy (di usab tinuod niining ngalan) midangop sa kapolisan ug nagpakitabang aron masakpan ang iyang asawa nga nakighilawas sa kabit niini sulod sa ilang balay.

Nasayran sa Banat News gikan sa kapolisan sumala sa sumbong ni Roy nga puwerting kayud niya og pamasahero sa tibuok adlaw yawat nalang mokita siya og dako ilabi na nga daghang pasahero kay adlaw kadto sa Valentina ug Valentino. Gani kasagaran sa iyang mga pasahero, pulos gyud nanagpares paingon sa mga motel sa dakbayan sa Sugbo ug Mandaue.

Unya nianang pagka alas 10:00   sa gabii, tan-aw niya nga dako-dako na ang iyang kita nakahukom siya sa pagpauli sa ilang balay aron saw-an niya ug sa iyang minahal nga si Joy ang katam-is  sa gugma agi og pagsaulog sa adlaw sa gugma.

Sa iyang kahinam sa iyang asawa ilabi nga may panagway kini uban sa maayong pagkalalik ang lawas nga maoy pag-ingnon nga mamords kaayo, gusto unta niyang suprisahon hinungdan nga wala gyud siya manawag pinaagi sa cell phone o bisan sa pag-text nga siya mouli na.

Human niya iparking ang iyang taxi distansya sa ilang balay, misamot ang iyang kahinam nga nag-imagine sa kaanyag sa iyang asawa nga naghigda sa katre uban sa pinaigdal nga lawas niini.

Busa pag-abot niya sa ilang balay, iya unang gisil-ing sa gamay nga gawang sa ilang bongbong sa pagtuo nga naghigda ang iyang asawa dihang maoy misugat sa iyang panan-aw ang iyang asawa nga usab sa ilang silingang si Boy nga nag-akob samtang malipayon kaayong naghilawas.

Wala siya kaagwanta nga nagtan-aw sa maong eksina ug inay bakyawon ang kaugalingon niyang mga kamot batok sa iyang pinanggang asawa ug sa lalaki nga kadug niini, mipasirit siya sa iyang taxi paingon ngadto sa buhatan sa kapolisan ug iyang gisumbong ang nasaksihan niya bahin sa iyang asawa ug sa kabit niini.

Si Inspector Abot ug mga sakop niini dali nga misanong sa hangyo sa bana ug miadto dayon kini sa balay sa hingtungdan diin naabtan nila sa akto nga nagkabuang sa pagsul-ob sa iyang brief ug purol ang lalaki ug ang asawa sa drayber dali usab kaayong nakatapis og tualya sa iyang lawas.

Kasamtangang gibalhog ang duha sa prisohan diin ang lalaki tua magkagulkol sa Presinto 3, samtang ang babaye tua usab sa Presinto 5 sa Mandaue City Police Station samtang giandam na ang tukmang kaso batok kanila.  - BANAT NEWS