CEBU, Philippines - Usa ka wanted tungod sa kasong murder ang nasikop sa sakop sa Criminal Investigation Bureau (CIB) sa Cebu City Police Office uban sa kapolisan sa dakbayan sa Talisay kagahapon sa buntag diha sa barangay San Roque sa nahisgutang siyudad.
Ang suspetsado mao si Joseph Padin, nagpuyo diha sa nahisgutang dapit kinsa gidakop nila ni SPO1 Jeffrey Diola sa CIB sa CCPO uban nila ni PO2 Roy Lofranco ug PO1 Euwen Pitogo sa Talisay City Police Station.
Dala sa maong mga polis ang warrant of arrest batok kang Padin nga giluwatan ni Regional Trial Court Judge Bienvenido Saniel Jr. sa Branch 20.
Si Lofranco nga nahinabi sa Banat News kagahapon mibutyag nga ang insidente sa pagpatay nahitabo niadtong tuig 2008 diha sa barangay Tisa, dakbayan sa Sugbo kinsa kauban ni Padin nga mga suspetsado mao sila si Marlon Osorno ug Monosto Baylosis alyas “Esto.”
Matud ni Lofranco nga si Osorno ug Baylosis ang unang mga nasikop samtang si Padin nakasibat kini ug nagtago ngadto sa lungsod sa Talibon, probinsiya sa Bohol apan mibalik sa Sugbo ug nagpuyo diha sa barangay San Roque.
Ang korte wala motugot sa mga suspetsado nga makabutang og piyansa alang sa ilang temporaryong kagawasan. - BANAT NEWS