Gipasanginlang kawatan giluba patay

CEBU, Philippines - Usa ka lalaki nga gipasanginlang kawatan gidunggab patay alas 10:30 sa gabii atol sa Valentine’s Day didto sa sitio Viking Alaska, barangay Mambaling ning dakbayan sa Sugbo.

Ang biktima mao si Rovel Villanueva, 30, minyo, product specialist sa Whirlpool ug residente sa 782 F. Villa St., sa barangay T. Padilla, ning dakbayan sa Sugbo.

Samtang ang suspetsado nailhan usab nga mao si Rustom Beldad, 18, ulitawo nga taga sitio Sto. Niño, barangay Duljo, ning dakbayan.

Si PO2 Ledio Libres Jr., sakop sa Police Station 2 sa Cebu City Police Office (CCPO) kinsa maoy nakasikop sa suspetsado mitug-an sa mga tigbalita nga samtang nagsakay siya sa iyang   motorsiklo paingon sa iyang duty   sa Police Station 2 nasigpatan niya ang biktima nga gigukod sa suspek ug kini gidunggab dayon sa makadaghang higayon sa suspek ang nagkalainlaing bahin sa lawas sa biktima.

Gihatod dayon sa mga tagtungod ang biktima ngadto sa Cebu City Medical Center apan gideklarar kining patay na sa pag-abot didto.

Samtang wala makadagan og layo ang suspetsado kay nabantayan man ni Libres ug nasikop dayon kini. 

Gisakmit usab ni Libres ang icepick sa suspetsado nga gigamit niini sa maong krimen.   

Nagduda ang kapolisan nga sakop sa gang ang suspek tungod sa kadaghang tattoo sa kalawasan niini ug gani gipasanginlan kining kawatan.

Ang suspek kasamtangang gitanggong sa Mambaling Police station samtang giandam na ang kasong isang-at batok kaniya sa mga tagtungod sa biktima.  - BANAT NEWS