Molimos sikopon sa Citom ug polis

CEBU, Philippines - Ang kagamhanan sa dakbayan sa Sugbo mogamit sa serbisyo sa mga tinugyanan kapolisan ug sa trapiko aron pagsanta sa publiko gikan sa paghatag og limos sa mga makililimos aron sila mohunong na sa ilang pagpakilimos.

Mao kini ang gibutyag   ni Cathy Yso, hepe sa Department of Social Welfare and Services (DSWS) kinsa miingon nga aduna na’y pasiunang giumol nga sugyot nga gamiton ang mga sakop sa Cebu City Traffic Operations Management (CITOM) ug Cebu City Police Office sa higpit nga pagpatuman sa anti-mendicancy ordinance sa siyudad.

Giangkon ni Yso nga kuwang sila og tawo hinungdan nga dili dayon nila mabadlong kadtong mga tawo nga mohatag og limos sa makililimos.

Matud pa ni Yso nga iyaha na nga ipadangat sa Anti Mendicancy Board ang ilang sugyot aron pormal kining matuki   sa konseho.

Dugang pa niya nga ang pagsiaw karon sa mga Badjao nga magpakilimos sa kadalanan ning dakbayan naggumikan sa publiko kinsa mohatag og limos kanila.

“Please lang , dili nato tagaan ang makililimos sa kadalanan ,kay kung mohatag ta, mao mana ang maka-encourage nila nga mobuhat nianang butanga,” matud pa ni Yso.

Ang Cebu City Anti Mendicancy Task Force (CCAMTF) midoble karon sa ilang paningkamot pag-abog sa mga makililimos ning siyudad ug sa pagbadlong sa mga tawo gikan sa paghatag og limos ngadto kanila.

Sayo niini gipadayag sa hepe sa CCAMTF nga kinahanglang motuman gyud ang katawhan sa City Ordinance 1631 nga nagdili sa paghatag og kuwarta ngadto sa makililimos ug ang molapas niini pahamtangan og multa nga   P1,000.    - BANAT NEWS