Gov.Garcia modunol og hinabang sa Negros Or
CEBU, Philippines - Ang kagamhanan sa lalawigan sa Sugbo motunol na usab og hinabang karong adlawa ngadto sa lalawigan sa Negros Oriental nga maoy grabeng naapektuhan sa nahitabong 6.9 magnitude nga linog nga mitay-og sa miaging semana.
Si Gob. Gwendolyn Garcia miingon nga lakip sa hinabang nga ihatag mao ang tabang pinansyal ug relief goods diha sa pito ka mga lungsod ug syudad sa Negros Oriental nga mao ang Ayungon, Bindoy, Guihulngan City, Jimalalud, La Libertad, Tayasan, ug Vallehermosa.
Ang probinsya sa Sugbo una nang mitunol og P12.5 milyones nga salaping hinabang ug balor P4.7 milyones nga hinabang nga relief goods susama sa bugas, tubig, noodles, ug sardinas sa nakalabay’ng mga adlaw.
Ang National Food Authority maoy moapod-apod sa bugas ngadto sa pito ka mga naapektahang lungsod nga bayran sa lalawigan sa Sugbu.
Matud pa ni Garcia nga ang katawhan angayan nga mapasalamaton ni Sr. Sto. Niño sa proteksyon niini sa Sugbo.
“Kita motabang gyud ta as much as we can, kay mas maayo nang kitay motabang nungka kitay tabangan magpasalamat tang Sr. Sto. Niño,” pasabot pa sa gobernadora.
Base sa report sa Provincial social Welfare and Development Office adunay kapin 21 mil ka mga pamilya ang naapektuhan sa pito ka lungsod ug siyudad. (BANAT NEWS)
- Latest
- Trending
