Davide, Sonny O. nag-usa sa Mass Wedding

CEBU, Philippines - Ang provincial chairman sa Liberal Party Atty. Hilario Junjun Davide III ug Vice Governor Agnes Magpale maoy nag-unang mga sponsor sa mass wedding nga gipasiugdahan ni Barili Mayor Teresito “Ondo” Marinas kagahapon atol sa kasaulogan sa Valentines’ day.

Mikabat og 10 ka parisang kinasal nga pulos mga molupyo sa maong lungsod kinsa nagtipon nga di kasal sulod na sa pipila ka tuig gumikan sa kaapiki sa kuwarta nga igasto sa kasal.

Maoy hinungdan nga dihang nasayran ni Mayor Marinas iya kining gigastohan sa pagpakasal didto sa Sta. Ana Parish Shrine sa Poblacion, Barili kagahapon sa alas 9:30 sa buntag.

Gumikan sa panagpares nila ni Davide ug Magpale, misamot ang kabaniog sa ilang mga ngalan ilabi na nga sila ang gihugon -hugonang magpares usab pagkandidato sa pagka-gobernador ug bise gobernador,   ang usa’g-usa ubos sa LP sa 2013 election atbang sa One Cebu Party .

Hinuon si Magpale wala makatambong sa maong mass wedding tungod sa mahinungdanon niyang giatiman apan nagpadala lang kini og representante nga si Hida Largo nga iyang staff

Gawas kang Davide ug Magpale, si kanhi senador Sonny Osmeña kinsa mokandidato atbang ni Kongresista Pablo John Garcia sa umaabot nga election sa ikatulong distrito, mibarug usab nga   sponsor kauban nila ni kanhi Kongresista Dr. Antonio Yapha , kanhi mayor Tony Paras, kanhi mayor Chuckbong Nemenio ug uban pa.

Si Mayor Marinas mibutyag sa Banat News nga sila maoy migasto sa giandam nga paniudto human kasla ang 10 ka mga parisang magtiayon.

Si Marinas usa ka kanhi sakop sa One Cebu Party ni Governor Gwendolyn Garcia kinsa mitapon sa LP ubos sa pagpanguna ni Davide. – WC (BANAT NEWS)