Negosyo nagpaluyo sa gipatay'ng babaye

CEBU, Philippines - Anggulo bahin sa negosyo maoy unang gisubay sa mga imbestigador bahin sa pagpusil patay  sa usa ka babaye sulod sa usa ka bakery sa barangay Maguikay, dakbayan sa Mandaue sa miaging hapon.

Si SPO4 Fernando Gabutero sa kapolisan sa Presinto 4 sa Mandaue City Police Office (MCPO) nagkanayon nga nagbase sa barangay Casuntingan   ang namatay nga si Cherry Justelero, 34, nga taga Samar apan dinhi na nagpuyo sa barangay Lahug, dakbayan sa Sugbo

Matud pa ni SPO4 Gabutero nga kuyog sa biktima ang kasosyo sa negosyo nga si Pantaleon Sandot, 32 , nga taga barangay Cambaro sa dakbayan sa Mandaue nga nag-snacks niadtong higayona samtang nagpaabot sa usa ka supplier og lana alang sa tukoron nilang bakery .

Sa ilang pakisusi, nasayran nila ni Gabutero nga ang bana usab diay sa biktima nga si Rodulfo Justelero Jr, gipusil patay usab diay didto sa dakbayan sa Tanjay, Negros Oriental sa miaging buwan.

Namatay ang biktima gumikan sa samad pinusilan sa tiyan ug padayon pang gipangita sa kapolisan ang kriminal kinsa gituohan nilang may pagdumot   sa biktima gumikan sa negosyo. (BANAT NEWS)