Biktima sa linog libreng makapanawag

CEBU, Philippines - Ang Globe Telecom miabag sa lokal nga kagamhanan sa Negros Oriental pinaagi sa pagtukod og sentro sa telepono nga libre niadtong mga biktima sa linog nga motawag sa ilang mga minahal sa kinabuhi dinhi sa nasud ug sa gawas.

Matud pa ni Cathy Porlas, tigpamaba sa Globe nga ang maong centro nga gitawag Libreng Tawag ug Libreng Charging center gitukod karon sa lungsod sa Jimalalud, Guihulngan, Tayasan ug La Libertad.

Miingon usab si Porlas nga gawas sa Negros Oriental ang Globe nagtukod usab og   Libreng Tawag center didto sa   Dapitan City, Zamboanga del Norte nga sa pagkakaron naglubog sa tubig sa uwan gumikan sa walay bugto nga pag- uwan didto sukad pa niadtong Miyerkules.

Pinaagi niining Libreng Tawag nga serbisyo, ang mga molupyo   nga apektado sa linog sa miaging semana didto sa Negros Oriental wala nay bayad kung sila mogamit sa telepono sa Globe didto sa Libreng Tawag center .

Apan gawas sa libreng tawag sa telepono, libre usab silang makapa-charge sa battery sa ilang cell phone sa maong mga sentro tungod kay ang maong mga lugar wala pay kuryente hangtod karon.

Ang Libreng Tawag sa Globe nahimutang sa Jimalalud Poblacion   Central School, Negros Oriental State University ug Tayasan Police Station. Samtang sa Dapitan City ang LibrengTawag center nahimutang sa   Burgos Elementary School.

Si Porlas midugang usab nga ang Globe nagsugod na sa ilang relief operation o pagpang-apud-apod og hinabang didto sa Sitio Nagkalhim, Sitio Calubinhan, Sitio Cadre, ug Sitio Bucana, pulos mga suok nga bahin sa Guihulngan.

Miingon si Porlas nga ang Globe kauban sa Department of Social Welfare and Development (DSWD) sa pagpanghatag sa mga hinabang ngadto sa mga biktima sa linog

Ang Globe maoy nag-supply og   prepaid load sa opisina sa DSWD sa Guihulngan aron dali ra kining makapanawag sa ilang mga hinabang sa mga nabiktima sa katalagman. (BANAT NEWS)