CEBU, Philippines - Giklaro sa buhatan ni Governor Gwendolyn Garcia nga sayop ang alegasyon sa usa ka environmental lawyer nga kulang sa permiso ang reclamation project sa lungsod sa Cordova.
Matud pa ni Provincial Legal Officer, Atty. Marino Martinquilla nga legal ug kompleto sa mga dukomento ang maong reclamation project ug sayop ang pagtuo sa usa ka environmentalist kinsa mipagawas og balita nga matud pa walay pagtugot gikan sa Philippine Reclamation Authority (PRA) ang nahisgotang proyekto.
Sumala ni Martinquilla nga ang maong proyekto sa lalawigan wala na magkinahanglan og pagtugot gikan sa PRA kay subay sa batakang balaod ang kagamhanan sa probinsiya may gahum sa paghimo sa kaugalingon niining reclamation nga dili na magkinahanglan og pagtugot sa PRA sanglit usa man ka local government unit ang nagpasiugda niini .
Midugang si Martinquilla nga gawas sa balaod nga nagtugot sa gihimong proyekto sa lalawigan aduna usab kini Environmental Compliance Certificate (ECC) gikan sa Department of Environment and Natural Resources-7.
Si Gobernador Garcia sa iyang bahin nagdumili na sa pagluwat og pamahayag kalabot sa pasangil sa maong environmentalist kansang ngalan wala ibutyag sanglit tataw man kaayo nga dili tinuod ang maong pasangil. (BANAT NEWS)