4-oras nabara ang trapiko sa tuyan, Naga

CEBU, Philippines - Nabalda sulod sa upat ka oras ang dagan sa trapiko diha sa National Road sa barangay Langtad, dakbayan sa Naga tungod sa natumbang kapin usa ka gatos ka tuig na nga punoan sa Acacia.

Si Naga City Administrator Arthur Villamor mibutyag nga ang maong Acacia nga nagpanuigon na og 100 ka tuig natumba kini pasado ala 1:00 sa kaadlawon kagahapon.

Hinuon walay naangol o naigo sa pagkatumba niini gawas sa naguba nga koral diha sa duol ug ang pagkabara sa trapiko. Gituohan nga tungod sa katiguwangon na sa kahoy ug ang gamot niini gabok na hinungdan nga natumba.

Ang nahisgutang karsada mao ray agianan gikan sa dakbayan sa Sugbo paingon sa habagatang bahin sa lalawigan sa Sugbu. Nahawan sa city engineering ang karsada mga alas 5:00 na kagahapon sa buntag inabagan sa silingang lungsod sa San Fernando nga nagpadala og chainsaw ug heavy equipment sa paghakot niini.

Lakip sa naapektahan mao ang manumoray og mga utanon ug prutas gikan sa habagatang kalungsoran nga dad-on sa kamerkaduhan sa dakbayan sa Sugbu. (BANAT NEWS)