CEBU, Philippines - Usa ka kapin tuig nga batang babaye ang nalumos sa baldeng adunay sulod nga tubig niadtong Domingo sa hapon diha sa sitio Quasi sa barangay Tuyom sa dakbayan sa Carcar.
Ang biktima mao si Giemica Ombog, usa pa ka tuig ug unom ka bulan ang panuigon nagpuyo sa iyang mga apohan diha sa nahisgutang lugar.
Si Leonora Navua,50, apohang babaye nga nahinabi sa Banat News kagahapon sa buntag diha sa ilang pinuy-anan misaysay nga niadtong Domingo sa hapon siya ug ang iyang anak babaye nga si Margie, 20, nga maoy inahan sa bata kinsa mabdos og walo na ka buwan nangita og mansanitas nga maoy ihampol sa iyang tiyan alang sa panuhot.
Matud ni Leonora gibilin nila ang bata sa iyang usang anak babaye nga bag-ohay lang nauli gikan sa trabaho. Sumala pa niini nga ang bata gipatong sa iyaan sa terasa tungod kay magpasalida unta kini sa telebisyon.
Sa ilang pagbalik gikan nangita og mansanitas naabtan nalang nilang nagpinangitaay na ang mga tawo sa balay lakip na ang apuhang lalaki niini nga si Jesus kung asa na napunta ang ilang apo.
Si Leonora nga daw gikabig ang atensyon paingon sa ilang pansayan sulod sa balay hinungdan nga giadto niya kini ug mao nalay iyang nakita ang nagbandera nga duha ka tiil sa apo ug ang nawong ug lawas nahumol sa tubig.
Ang baldeng gikalumsan sa bata tinabas nga gallon sa container nga maoy gihimo nilang balde ug niadtong tungora adunay sulod nga tubig. Matud sa apohang babaye nga nakadungog siya og siyagit sa bata apan wala niya kini panumbalinga sa pagtuong nagduwa-duwa lang sa sulod sa ilang balay ang bata.
“Nagtuo man ko nga diha ra ni siya sa sulod kay magdagan-dagan baya ni siya unya magsiyagit-siyagit, pero nakabig akong atensyon paingon diri sa CR namo,” saysay pang Leonora nga mitudlo sa iyang kamot sa pansayan dihang nahinabi sa Banat News. Wala sila magtuong mosulod sa pansayan ang iyang apo sanglit ilaha man kini hadlukon pirme nga dunay ‘ok-ok’ hinungdan nga dili gyud kini molahos didto.
Ang mga pulis nga miabot sa lugar misuway og dala sa bata sa Carcar District Hospital apan gideklarar kini nga dead on arrival (DOA).
Si Margie inahan sa bata mitug-an sa Banat News nga wala gyud sila makahibawong misulod ang iyang anak sa pansayan.
Ang iyang banang si Michael, 22, nga usa ka baker sa usa ka panaderiya sa barangay Cantabaco sa dakbayan sa Toledo wala diha pagkahitabo sa iyang anak.
Ang biktima gilubong na kagahapon sa hapon diha sa sam-ang katoliko sa dakbayan sa Carcar. Si PO3 Randy Chavez nga nahinabi sa Banat News nga maoy usa sa nag-imbestigar miingon nga walay foul play silang nakita sa kamatayon sa bata sanglit ang doktor sa Carcar District Hospital nga si Dr. Allan Mercado nga maoy mihiling sa bata mitug-an kanila nga nalumos gyud ang bata. - EIM (BANAT NEWS)