Geo-hazard map atimanon - Quisumbing

CEBU, Philippines - Si Representante Gabriel Luis Quisumbing sa ika-unom nga distrito sa lalawigan sa Sugbo mimando sa nagkalainlaing ahensya sa kagamhanan nga may kalabtanan sa pagpaniid sa kahimtang sa kinaiyahan ug sa palibot nga han-ayon pag-ayo ang geo- hazard map niini.

Si Quisumbing kinsa maoy co-chairman sa House Committee on National Defense sa ubos bay balaoranan nagkanayon nga ang pag-alayon sa mga ahensya sa kagamhanan aron mabantayan pag-ayo ang publiko gikan sa epekto sa mga nagkalainlaing katalagman nga mugna sa kinaiyahan gikinahanglan kaayo.

Ang pipila sa mga ahensya sa kagamhanan nga dako kaayo og kalabtanan sa pag-atiman sa palibot kun may katalagman mao ang Office of C ivil Defense, (OCD) Philippine Institute of Volcanology and Seismology, (PHIVOLCS) Philippine Atmospheric Geo-physical and Astronomical Services Administration (PAGASA) ug National Disaster Risk Reduction Management Council.

Ang geo-hazard map matud pa ni Quisumbing maoy magsilbing Biblia nga mohatag og giya sa tanang hingtungdang ahensya aron kalikayan ang paghatod og dili tukmang kasayoran ngadto sa publiko.

Mahinumdoman nga human sa linog nga may magnitude nga 6.9 niadtong miaging semana, mibanos ang tsunami alert level 2 nga gisibya sa Phivolcs ug gumikan sa dili maayong interpretasyon sa kadaghanan, daghang nahadlok   ilabi na dihang may nagpasiugda og mga balita nga sayop bahin sa maong tsunami alert.

Miingon si Quisumbing nga gumikan sa maong kasinatian iyang gimando sa nahisgutang mga ahensya nga kanunayon ang pagkompleto sa mga datos sa geo-hazard map diin ibase sa mga tinugyanan niini ang husto ug tukmang pahibawo nga angay ipahayag ngadto sa publiko sa panahon sa mga kalamidad, sama sa bagyo, linog, baha, ug uban pa. (/WC) (BANATNEWS)