Saint Claire of Assisi relic dad-on dinhi sa Sugbu

CEBU, Philippines - Gitakdang mobisita sa Sugbo ang milagrosong relic ni St. Claire of Assisi gikan sa nasud sa Italy karong Pebrero 22 diin kini manukad alang sa himuong pilgrimage sa relic sa nagkadaiyang lugar sa nasud.

Ang pilgrim relic ni St.Claire moabot sa alas-2:30 sa hapon sa Pebrero 23 sa Mactan Cebu International Airport ug ihatud kini sa Cebu Metropolitan Cathedral diin usa ka Santos nga Misa ang pasiugdahan ni Cebu Archbishop Jose Palma.

Usa ka public veneration ang sugdan ini’g alas-10:00 sa gabii diha sa cathedral ug sa sunod adlaw ibalhin kini ngadto sa Poor Claire Monastery sa Tayud, Consolacion diin kini magpabilin hangtud sa Pebrero 25. Ang maong relic usa ka bukog gikan sa parte sa ulo ni St.Claire kinsa mao ang ‘Patroness of the Television.’

Si Sister Juanita Marie Paul Ilio sa Order of St.Claire (OSC), nagkanayon nga nailhan ang santos nga milagrosa alang sa mga minyo nga nag-ampo nga makaanak ug sa mga masakiton nga gustong maayo.

Sa iyang bahin, ang chairman sa The Freeman ug Banat News nga si Dr. Jose ‘Dodong’ R. Gullas nga usa sa mga nangusog nga madala ang relic dinhi sa nasud, nagkanayon nga bulahan ang mga Sugbuanon tungod sa kahigayunan nga makakita sa relic sa milagrosang si St.Clare.

“I would like to invite all the Cebuano because this is something very special to us,” matud pa ni Gullas. “I’m happy because every one of us (Cebuano) will have this chance.”

Ang relic ni St. Claire magpabilin dinhi sa nasud sulod sa duha ka buwan. Gawas sa Sugbo isuroy usab ang relic sa pipila ka syudad sa Mindanao ug Luzon sa dili pa kini ibalik sa Italy.

Kini ang labing unang higayon nga mobisita ang relic ni St.Claire sa usa ka nasud sa Asya. (BANATNEWS)