May pahimangno ang CCPO sa nakauyab pinaagi sa text

CEBU, Philippines - Gipahimangnoan ni Sr. Supt. Melvin Ramon Buenafe, hepe sa Cebu City Police Office (CCPO) ang mga tawong nakauyab pinaagi lang sa text apan wala pa personal nga nagkitaay sa pagbantay ug dili mokumpiyansa nunot niining Valentines Day karong adlawa.

Matud pa ni Buenafe nga kinahanglang dili dayon motuo ang mga lalaki o babayeng nakakaplag og uyab pinaagi lang sa text ug kun kalikayan pa mas maayong dili lang una sila makigkita hangtud nga di nila masuhito ang pagkatawo sa ilang nauyab diha sa text.

Gipasabot ni Buenafe nga kini aron lang pagsiguro sa ilang seguridad tungod sa posibilidad nga badlungon sa katilingban ang maong mga tawo.

Samtang hugot nga seguridad ang ipatuman sa kapolisan karung adlawa ilabi na sa mga lugar nga maoy paboritong adtuon sa mga managhigugmaay. Ang mga pulis pasul-obon og unipormeng dunay gibutang nga pormang kasingkasing aron pagpakita nga lakip sila sa nag-selebrar sa adlaw sa panaghigugmaay.

Sa laing bahin, mapasalamaton si Msgr. Esteban Binghay, Episcopal Vicar sa Cebu Archdiocese nga walay mahitabong pagpanghatag og libreng condoms gikan sa Department of Health (DOH)-7 dinhi sa Sugbu. Matud ni Binghay dihang nahinabi sa Banat News nga usa kini ka maayong balita. Ang simbahan mikunsiderar nga dakong sala ang paggamit og mga contraceptives.

Samtang ang Regional Director sa DOH Dr. Susana Madarieta mibutyag sa Banat News sa diha nga nahinabi kini nga wala silay nadawat nga kamandoang mang-apud-apod sila og condoms. (Rey Pasaporte ug report ni Lesley Caminade-Vestil/EIM)  (BANATNEWS)