Water system sa Liloan gisubhan ni Gwen

CEBU, Philippines - Gisubhan ni gobernador Gwendolyn Garcia sa miaging adlaw ang P113 milyones nga Mulao Level II Water System Project nga nahimutang sa bukirang bahin sa lungsod sa Liloan.

Misaksi sa maong makasaysayanong kalihukan mao sila si Provincial Board Member Jude Durano Sybico, Liloan Mayor Duke Frasco, ang mga representante sa Aboitiz Foundation ug uban pang mga lokal nga opisyal.

 Ang nahisgotang proyekto hiniusang gi-ugmad sa lalawigan uban sa lungsod sa Liloan nga maoy mitaod og 17 ka mga communal faucet sa nahisgutang barangay.

 Aron usab nga makaabot sa labing suok nga lugar ang serbisyo sa tubig, ang Aboitiz Foundation mihatag og hinabang nga dul-ang P500 mil alang sa palitonong mga tubo ug bomba sa tubig.

 Subay sa malamposon nga pagpatuman sa maong proyekto gipalanog ni gobernador Garcia ang iyang kalipay tungod sa katumanan sa iyang tinguha nga makaangkon ang barangay Mulao og limpyo ug luwas nga imnunong tubig.

Sa iyang bahin, mapasalamaton usab kaayo si mayor Duke Frasco ngadto sa gobernador ug sa mga tawo ug institusyon nga mitabang sa katumanan sa maong proyekto.

Kaubang mipasalamat sa gobernador mao si kapitan Benjamin Tanjay sa Mulao kinsa mitamod kang gobernador Garcia nga maoy instrumento aron matuman ang usa ka proyekto nga ilang gidamgo sulod na sa taas nga panahon.  - BANAT NEWS