Pantawid program suportado sa Talisay

CEBU, Philippines - Ang konseho sa dakbayan sa Talisay mihatag og pagtugot kang Mayor Socrates Fernandez nga mogama og Memorandum of Agreement (MOA) tali sa Department of Social Welfare and Development (DSWD) alang sa Pantawid Pamilyang Pilipino Program (PPPP) o Pantawid Pamilya.

Ang Resolusyon No. 2012-05-01 nga gipangamahanan ni Konsehal Celiapo Cabuenas chairman sa committee on Social Welfare Services giaprobahan sa konseho sa siyudad niadtong Martes atol sa ilang regular session.

Ang maong resolusyon mohatag og suporta sa programa sa DSWD   sa pagtuman sa ilang vision- mission ug mandato sa pagtabang sa mga kabus nga pamilyang Pilipino.

Tumong usab sa maong proyekto mao ang pagtubag sa duha sa tulo ka mga kab-otonong butang sa National Sector Support for the Social Welfare and Development Reform Program (NSS-SWDRP) nga mao ang pagpakunhod sa kalisud sa pamuyo ug paghatag og gahum sa mga kabus.

Aron sa pagsiguro nga mahimong epektibo ang nahisgutang programa ang DSWD maoy gitahasan sa pag-implementar niini apan kinahanglang makig-alayon sila sa ubang mga ahensiya sa gobiyerno, local government unit ug non-government organization.

Matud ni Cabuenas nga ang Talisay nagpakita og ka interesado sa programa ug andam nga makig-uban sa DSWD ug sa uban pang ahensiya sa kagamhanan aron matabangan ang mga kabus nga molupyo sa maong dakbayan.  - BANAT NEWS