Topnotcher sa TCC gantihan

CEBU, Philippines - Ang kagamhanan sa dakbayan sa Talisay gitakdang mohatag og cash incentive ngadto sa mga mogradwar sa Talisay City College (TCC) nga masulod sa top 10 sa bisan unsang licensure examination. Niadtong Martes sa milabay’ng semana giaprobahan sa konseho sa siyudad ang resolusyon alang sa maong katuyoan. Ang nahisgutang resolusyon mipasabot nga ang mga top notcher maghatag kini og dungog dili lang sa ilang tunghaan kundi lakip na sa siyudad.

Tumong sa konseho mao ang paghatag og kadasig sa mga estudyante sa TCC nga maningkamot pag-ayo sa ilang pagtuon. Si Bise Mayor Alan Bucao kinsa maoy nangamahan sa nahisgutang resolusyon nagkanayon nga angayan lang nga hatagan og incentives ang mga topnotcher ilabi na nga kasagaran kanila naggikan sa kabus nga pamilya.  - BANAT NEWS