Hubog milutaw sa dagat patay na

CEBU, Philippines - Patay na nga napalgan kagahapon sa kaadlawon ang usa ka mananagat kinsa giingong hubog nga naglutaw sa kadagatan sa barangay Pooc, dakbayan sa Talisay.

Ang nahisgutang mananagat mao si Victoriano Sotomayor, 68, nga taga barangay Upper Mohon, sa maong dakbayan.

Sila si Inspector Hugo Rio Ipong, PO2 Roy Lofranco ug PO1 Euwen Pitogo maoy daling miresponde sa report nga ilang nadawat bahin sa gialarmang tawo nga naglutaw sa dagat.

Sa imbestigasyon sa maong mga polis, nasuta nga base sa pamahayag sa mga higala ni Sotomayor, nga pulos sila nakainom dihang nanagat sila kagahapon sa kaadlawon.

Apan sa dihang didto na sila sa dagat sakay sa ilang sakayan kalit lang nawagtang si Sotomayor ug mao nalay ilang nasayran nga milutaw na kini sa dagat   nga wala nay kinabuhi.

Gituohan nga gumikan sa kahubog, si Sotomayor nahagbong sa pumpboat nga ilang gisakyan nga maoy hinungdan sa pagkalumos niini.

Padayon pang gisuta sa kapolisan kun wala bay foul play ang kamatayon sa biktima.  - BANAT NEWS