2 ka pusher dakpan

CEBU, Philippines - Duha ka mga lalaki ang nadakpan sa kapulisan nga gidudahang tigpayuhot og ginadiling drugas sa barangay Ticad lungsod sa Bantayan sa isla sa Bantayan niadtong miaging gabii sa alas 9:30 ang takna ug usa sa ilang dinakpan taga dinhi sa dakbayan sa Sugbo.

Ang mga nadakpan nga suspek mao sila si Rocky Lucagbo Funda, 30, taga Brgy. Tisa sa dakbayan sa Sugbo human nakuhaan og duha ka putos nga gidudahang dunay sulod nga shabu ug mga kagamitan sa paghingos sa gidiling drugas.

Ang laing nadakpan nga iyang kauban mao si Armando Andrino, 52, molupyo sa maong lugar.

Matud ni PO1 George Gilbuela sa Bantayan Police dihang nahinabi sa Banat News ang kapulisan nagpahigayon og operasyon batok sa mga dautang elemento sa maong lungsod.

Pag-abot sa maong lugar ilang naagian daplin sa dalan ang duha nga nag-estoryahay ug naglingkod sa motor si Lucagbo nga pulos kadudahan ang linihukan hinungdan nga ilang gisukitsukit ug girekisa.

Didto nasakpan ang maong ilegal nga drugas gikan kang Lucagbo ug laing usa ka pakete kang Andrino hinungdan sa ilang pagkasikop ug gikatakdang pasakaan og kaso sa kalapasan sa RA 9165. (BANATNEWS)