CPPO naleksyon sa 'tsunami scare'

CEBU, Philippines - Nakakat-on og leksyon ang kapulisan sa probinsya sa Sugbu bahin sa nahitabong linog nga miigo dinhi sa Sugbu ug ubang bahin sa Central Visayas niadtong Lunes.

Si Sr. Supt. Patrocinio Comendador, hepe sa kapulisan sa probinsya sa Sugbu nga nahinabi sa Banat News nagkanayon nga makig-alayon siya sa mga mayor sa kalungsoran ug siyudad aron magtukod og crisis communication committee.

Kini maoy tahasang mopahibawo sa katawhan aron makapangandam kun dunay katalagman nga moabot.

Matud ni Comendador bisan og walay mga kadaut nga namugna sa linog niadtong Lunes sa probinsya apan iyang gimanduan nga makig-alayon sa mga mayor kun unsay buhaton.

Gidugang niya nga sa susamang panghitabo niadtong Lunes kinahanglan gyud ang komunikasyon nga magamit dayon sa mga local nga opisyal sa kalungsoran ug siyudad aron dili mag-panic ang katawhan.

Gidugang sa maong opisyal nga sa wala pa siya molingkod, iyang gi-require sa tanang kalungsoran nga magpalit gyud og megaphone aron magamit kini pagpahibawo sa katawhan kun dunay umaabot nga katalagman.

Apan human sa linog niadtong Lunes, dunay pipila ka mga police stations sa probinsya nga gihulagway nga delikado kun may motumaw nga katalagman.

Kini sama sa San Francisco Police station nga gitawag ni Comendador nga high risk police stations sanglit tulo ka andana nga building diin nahimutang ang buhatan sa kapulisan. Laing mga police station nga delikado ang gikahimutangan mao ang sa Asturias, Moalboal, Tabogon ug lain pang usa ka police station nga girekomendar ni Comendador ngadto sa mga mayor nga kinahanglan na kining i-renovate tungod sa karaan nang building.

Ang uban nga police station dili usab kaayo layo sa dagat ug peligro kini sa katalagmang motumaw.(/EIM) (BANATNEWS)