CEBU, Philippines - Tungod sa pusta sa hantak, usa ka construction worker ang gipatay sa iyang kauban sa trabaho nga iyang gikasugal sa dalan Ranudo, sa barangay Cogon Ramos ning dakbayan pasado alas-12:00 sa tungang gabii.
Ang biktima nailhan nga si Bernard Morijon, 24, lumad nga molupyo sa Guihulngan, Negros Oriental, samtang ang suspetsado nailhan usab nga si Artemio Flores, 42, molupyo sa lungsod sa Badian.
Sa imbestigasyon sa kapolisan nasayran nga ang biktima ug ang suspetsado nagduwa og hantak uban sa kaubanan niini dapit sa ilang barracks.
Taliwala sa ilang panaghantak nagkalalis ang duha tungod sa pusta ug dihang miinit ang tinubagay mikuha og kutsilyo ang suspetsado ug giduslak ang walang bahin sa dughan sa biktima.
Ang biktima daling gidala sa Vicente Sotto Memorial Medical Center apan gideklarar kini nga dead on arrival.
Human sa maong panghitabo ang suspetsado daling misibat ug karon gipangita pa sa kapolisan. (BANATNEWS)