Taksi nga may sakay nga manganakay girakrakan

CEBU, Philippines - Maayong pagkadasmag sa pine tree ang usa ka taxi human pusila ang drayber niini sa wala mailhing lalaki didto sa barangay Bulacao, dakbayan sa Sugbo, kagahapon sa ala 1:00 pasado sa kaadlawon.

Ang biktima mao si Antonio Fernandez, 52, molupyo sa Deca Homes sa lungsod sa Minglanilla, drayber sa Voyager Taxi nga adunay plakang CEO-477.

Sa imbestigasyon sa kapolisan nasayran nga ang biktima nagbiyahe padulong sa syudad sa Sugbo aron ihatod ang iyang pasaherong manganakay uban sa amahan niini. Apan sa pag-abot nila sa maong lugar nakita sa drayber ang usa ka motorsiklo nga gisakyan sa duha ka batan-ong lalaki.

Tungod kay nagdali man ang biktima mi-overtake kini sa mga batan-ong nag-motor apan kalit lang siyang gipusil sa tangkugo.

Tungod kay nakuyapan ang biktima   nabangga ang iyang taxi sa pine tree.

Samtang ang mga barangay tanod sa Bulacao dali usab nga nakaresponde ug midala sa biktima sa Cebu City Medical Center sakay sa ilang patrol car samtang ang manganakay nga 15-anyos ila usab nga gipasakay og laing taxi ug gidala ngadto sa Mother and Child Hospital .

Sa pakighinabi sa Banat News ni PO3 Geoffrey Gutual sa Cebu City Police Office Homicide Section, mibutyag nga wala makakuha ang biktima sa numero sa motorsiklo nga gisakyan sa mga batan-on. Matud pa ni Gutual nga igo lang nga nakahulagway ang biktima sa gunman nga mestisohon ug tambukon ang panglawas. (BANATNEWS)