Lawas mihangop nga himuong OIC sa LCPO

CEBU, Philippines - Gihangop ni Sr. Supt. Rey Lendon Lawas, hepe sa Regional Intelligence Division (RID)-7 nga siya maoy himuong officer-in charge (OIC) sa Lapulapu City Police Office (LCPO) hulip kang Sr. Supt. Anthony Obenza nga maoy kasamtangan hepe sa maong dakbayan.

Si Lawas nga mitambong sa conference sa Cebu City Police Office (CCPO) nga nahinabi sa mga tigbalita mibutyag nga dako kining dungog nga siya maoy gipili ni Mayor Paz Radaza sa dakbayan sa Lapulapu.

Apan iyang giklaro nga wala pay order ang Police Regional Office-7 kun kanus-a siya molingkod sa dakbayan sa Lapulapu. Si police regional director nga si Chief Supt. Marcelo Garbo maoy mopagawas sa maong kamandoan.

Gitug-an niya nga gimanduan siya sa ilang labaw niadtong nangaging mga adlaw nga adtuon ug pakigkitaan ang mayor diin ilang gihisgutan ang pagbutang sa mga tawong angayan sa ilang mga posisyon ug trabaho.

Gihisgutan usab ang problemang nagsaka nga crime incident sa maong dakbayan ug giisip niyang dakong tahas ug dili demosyon sa iyang posisyon ang pagbutang kaniya sa maong siyudad bisan nabutang na siya sa rehiyonal nga buhatan.

 “If you are City Director or Provincial director, you are a ground commander and implementor unlike sa regional staff ka kay you are a planning officer,” pasabot pang Lawas.  (BANATNEWS)