Night market sa bag-ong merkado sa Mandaue karon

CEBU, Philippines - Sugdan karong gabhiuna ang pagbukas sa night market sa parking area roof top sa bag-ong merkado publiko sa sitio Tribunal sa barangay Centro sa dakbayan sa Mandaue.

Si market administrator Mosulini Suliva miingon nga ilang gihatagan og tukmang oras nga kutob lang sa alas- 9 sa gabii ang mag-parking nga mga sakyanan sa parking area.

Si Suliva miingon nga hangtod sa alas-4 sa kaadlawon ang paninda sa night market nga naglakip sa mga ibaligya ang mga barbecue, painitan ug uban pa.

Gitataw ni Suliva nga ang mga kompaniya sa softdrink maoy mopahimutang og mga stalls, lamisa ug mga lingkoranan sa mamaligya sa panahon sa gabii.

Matud pa ni Mosulini nga ilang gituyo nga ang pagpamaligya hangtod sa panahon sa gabii sa tinguha nga madugangan ang kitaon sa mga vendors. (BANATNEWS)