Trak de karga ipa-ban sa Talisay

CEBU, Philippines - Aprobado na sa unang pagbasa sa konseho sa dakbayan sa Talisay ang gidusong ordinansahon ni Bise Mayor Alan Bucao nga mag-ban o magdili sa tanang trak de karga pag-agi sa kadalanan sa siyudad. Apan ang maong pagdili gitakdaan og oras matag adlaw aron malikayan ang kahuot sa trapiko ug disgrasya   ug ang daling pagkaguba sa mga dalan sa siyudad.

Ang maong ordinansa nagsubay sa rules and regulation sa Akta Republika 4136 nga mao ang “Land Transportation Act of the Philippines”.

Gawas sa mga ordinaryong trak de karga, lakip nga gidid-an ang mga fuel tanker, liquid carriers, LPG/LNG tankers, cement bulk carrier, 10 footer container van ug uban pang dagkong sakyanan nga motimbang og kapin 4,500   ka kilo nga gross capacity.

Ang oras nga dili paagion sa mga karsada sulod sa siyudad ang nahisgutang mga sakyanan mao ang gikan sa alas 5:30 sa buntag hangtud sa alas 8:30 sa buntag ug gikan sa alas 3:00 sa hapon hangtud sa alas 9:00 sa gabii , Lunes hangtud sa Biyernes. Samtang ang mga karsada nga dili paagian niini mao ang Rabaya, Polong Deiparine, Prisco Deiparine, Sangi road, Laray, Lagtang-Toledo Wharfroad, Sombrea-Pooc ug Linao-Mohon Dumlog road.

Hinuon ang mga trak sa kagamhanan sama sa sakyanan sa Department of Public Works and Highways (DPWH), Bureau of Jail Management and Penology (BJMP), engineering, ambulansiya ug fire truck wala mahilakip sa maong pagdili. Atol sa mga emerhensiya, disaster ug state of calamity ang pag-ban temporaryong ilibkas aron ang mga sakyanan sa relief goods, magkarga og mga evacuees ug uban pang mga disaster response dili malangan sa biyahe.

Ang multa sa unang paglapas P1,500, ikaduha, P2,500 ug usa ka semanang priso sa drayber ug sa ikatulong kalapasan, P5,000 ang multa ug imbargohon ang driver’s license. (BANATNEWS)