Gwen mipada'g hinabang sa Neg. Or.
CEBU, Philippines - Gipadala na ni Gobernador Gwendolyn Garcia ang mga hinabang alang sa mga nabiktima sa 6.9 magnitude nga linog nga nagdulot og grabeng kadaot sa lima ka mga lugar sa Negros Oriental.
Ang maong mga hinabang naglakip sa 1,600 ka sako sa NFA rice nga nagkantidad og P2 milyones, 500 ka karton sa sardinas nga nagkantidad og P532 mil, 500 ka karton sa instant noodles nga nagkantidad og P300 mil ug 300 ka pakete nga bottled water.
Gawas niini, nagpadala usab ang gobernador og mga medisina alang sa mga biktima sa maong kalamidad.
Gikatakda usab nga mohatag ang gobernador og P13 milyones nga financial assistance alang sa rehabilitasyon sa naguba nga mga infrastraktura sa maong lalawigan.
Ang maong kantidad gilangkoban sa P3 milyones nga unang gisaad sa gobernador kang Negros Oriental Governor Roel Degamo aron ipa-ayo sa naguba nga mga infrastraktura atol sa bagyong Sendong, P7 milyones alang sa naguba nga mga infrastaktura atol sa linog ug kapin P3 milyones nga hinabang pinansyal alang sa lima ka mga dapit nga grabeng naapektohan sa linog.
Samtang ang mga kontractor dinhi sa Sugbo nakig-alayon usab sa gobernador aron subling ikapadala ang ilang mga heavy equipment ngadto sa Negros Oriental aron magamit sa clearing operations.
Sa report nga nadawat sa Provincial Welfare and Development Office gikan sa National Disaster Risk Reduction Management Council (NDRRMC) nasayran nga mikabat sa kapin 15 mil ka mga pamilya ang apektado , 24 ang patay, 52 ang angol, 45 ka balay ang hingpit nga naguba ug 92 ka balay ang partially damaged sa maong linog sa Negros Oriental nga dili palang dugay gikuso-kuso usab sa bagyong Sendong. (BANATNEWS)
- Latest
- Trending
