Patay Migimaw

CEBU, Philippines - Usa ka patay’ng lawas ang nadiskubrehang gilubong sa usa ka mabaw nga lungag diha sa barangay Colonia sa lungsod sa Tuburan niadtong Martes sa hapon.

Gituohang gipatay ug gitago sa mga kriminal ang krimen apan tungod sa pagpunay og bunok sa uwan hinayhinay nga naanod ang gitabong yuta sa gilubngan niini daplin sa sapa.

Ang kapolisan miila sa biktimang naputos og samad dinunggaban sa kalawasan mao si Roel Bolina Recta, 34, molupyo sa barangay Fortaliza, Tuburan. Matud ni PO1 Eric Diamante sa Tuburan Police Station dihang nahinabi sa Banat News ang kapitan sa barangay Colonia nga si Macario Batal maoy mipahibalo kanila bahin sa migimaw nga patay’ng lawas daplin sa sapa.

Sa gihimong awtopsiya ni Dr. Trence Cabahug nga maoy municipal health officer sa Tuburan nasuta nga adunay mga fatal nga samad dinunggaban sa dughan si Recta ug gihiwa pa ang liog niini nga hapit maputol.

Gituohan ni Cabahug nga dili kaayo dugay nga gilubong ang patay’ng lawas tungod kay wala pa kini hingpit madugta.

Hinuon gibutyag sa mga kabanay atol sa pagsukitsukit sa kapulisan nga ang biktima dunay deperensiya sa panghunahuna ug milakaw kini niadto pang Domingo sa gabii nga wala na mabalik.

Ang kapulisan naghimo pa og subsob nga imbestigasyon sa maong panghitabo alang sa pag-ila sa mga kriminal.(/EIM)(BANAT NEWS)