Mail-order drugs gipanid-an

CEBU, Philippines - Midangop na sa kinaraang paagi ang mga sindikato sa ilegal nga drugas pinaagi sa paggamit sa koreyo aron makalusot ang ilang mga kontrabando ngadto sa ilang mga destinasyon sumala pa sa Philippine Drug Enforcement Agency-6.

Kini human makompirmar sa PDEA-6 nga duna nay nga tawong ilang gipanid-an nga nagdawatan og mga parcels pinaagi sa koreyo o mail-order nga illegal drugs ilabi na ang methamphetamine hydrochloride or shabu.

Bisan sa pagkakinaraan nga paagi, si Yogi Filemon Ruiz, ang direktor sa PDEA6 miangkong lisod kining sundon ilabi na ang mga mail addresses tungod kay magbalhin-balhin ang mga gipadad-an.

“Iba-iba ‘yung mga taong pinapadalhan. While these drug dealers employed the age-old way of sending parcels, they have been innovative on how to do it,” dugang pa niya. “They also evolve on how to package the delivery for authorities not to detect it.”

Sumala pang Ruiz hapit na usa ka tuig silang naniid sa mail-order drugs ug gihingusgan na nila ang pakig-alayon sa mga nagkadaiyang couriers sa Western Visayas lakip na ang pagbutang og mga K-9 units aron masusi ang mga bagahe sa nagkadaiyang lugar.

Matud pa nga nakadawat ang PDEA6 og mga impormasyong adunay mail-order illegal drugs nga gipadala sa Western Visayas.

“Pero ‘yung dalawa, na-i-deliver na when we received the information,” matud pa ni Ruiz samtang ang usa nasakpan nila sa Caticlan Malay, Aklan niadtong Hulyo 2011 nga miresulta sa pagkasikop sa P1M nga balor sa shabu.

Gituohang ang maong shipment gitagana ngadto sa Boracay. Miresulta ang maong operasyon sa pagkasikop sa usa ka Jona-Gin Liba, 20, nga taga San Fernando City, La Union ug sa kapuyo niining si Alexander Nebres, 38, nga taga Pasay City.

Ang duha nadakpan diha sa Caticlan Airport ug nakuhaan og tulo ka dagkong putos nga may sulod nga gidudahang shabu nga mitimbang og 70 gramos nga gipanid-an lang sa mga ahente hangtud nga kini gi-claim ni Liba. Ang illegal nga drugas giingong gisulod sa tulo ka mga speaker boxes.

Niadtong milabay’ng semana, ang Bureau of Customs (BOC) nakasakmit og 15 gramos nga shabu nga gipadala pinaagi sa koreyo diha sa post office sa Makati City. Kini giputos og tissue paper ug gisulod sa usa ka sobre nga gideklarar nga usa ka pendant nga gikan pa sa Britanya.  - BANAT NEWS